Universal Declaration of Human Rights - Huitoto Murui

Nana Comini Uri Illafue

Naga nairai Naciones Unidas railla rafuemo danomo duide. Perú iemo duide. Naga nairaimona damie jaide. Rafuena siadollena, danomo oficabidimaci. 10 de diciembre de 1948 bie rabemo ita rafuena llotimaci. Nana ie rafuena nana comini uiñollena jitaidimaci. Ie jira Perú ie gobierno bie rafuena birui cuetatate.

Nano llogafue

Biena uiño: Nana comini jiaie comini anamo iñellena, ie finua diese nagamie feiñollena, nana comini uri illena, bie rafuena lloticai. Comena nagamie jeicia jira, bie rafuena lloticai. Nana cominimo bie rafue daje isoi duide.

Biena uiño: Ailluena comini, diga icaiño jiaie cominimona duere sefuilla jira, nana comini jaciruiñeno iacana jira, naga comini rana iacana jira, bie rafuena lloticai. Duere sefui raillano, nana comini nie isoide rafuena jaciruiñeno llollena, bie rafuena lloticai. Duere sefui raillano, nana comini nie isoide rafuena jaciruiñeno llollena, bie rafuena lloticai.

Biena uiño: Naga gobierno ie cominina canua, naimacimo bie isoide rafue illena. Gobierno diga, jobaime naimaci finoñellena, bie isoide rafue ie cominimo illena, naga gobierno ie cominina canua.

Biena uiño: Naga nairai jiaie nairai diga, nabairillana caijitailla jira, bie rafuena lloticai.

Biena uiño: Naga Naciones Unidamo duide nairai bie rafuedo jaiacana jira, bie rafuena lloticai. Nagamie comena jeiciga. Iima riño baifemo faiñede. Riño iima baifemo faiñede. Comini duere itinona jitaiñedicai, iadedi naimaci uri caimare illana jitaidicai.

Biena uiño: -Danomo bie rafue llocana jaiticai - nana Naciones Unidamo duide nairai llotimaci.

Biena uiño: Bie rafuena nana comini raise atona uiñuana jitaidicai. Iena nana comini uiñuamona, bie rafue suicana jaite.

Danomo ofillanona bie rafuena lloticai

Nana comini bie rafue anamo jitaidicai. Naga nairai bie rafuena iiuana jitaidicai. Bie rafuena naimaci cominina llofuiana jitaidicai. Naga nairai bie rafue lloga uai finuana jitaidicai, nana naimaci comini bie rafuena ollena. Ie jira bie rafuena lloticai.

Rafue 1.

Nana cai comuillamona dama cai abido iticai. Cai comuillamona jiaimie anamo iñedicai. Nana daje facaiconi iticai. Abi uiñuanona comuidicai. Dani coninirie cai nabairilla.

Rafue 2.

Nana cominimo bie rafue duide. Naga nairaimo bie rafue duide: naga riñomo, naga iimamo, Jusiñamuina sedadimiemo, Jusiñamuina sedañedimiemo, jamai bue isoidimiemo, jamai bue isoiñedimiemo, dueredimiemo, ucuberedimiemo, riai uaina ñaitimiemo, jiaie uaina ñaitimiemo, diese itinomo bie rafue duide. Nie isoide gobierno anamo naimaci ia, bie rafue nana naimacimo duide.

Rafue 3.

Nana comini illana jitaidicai. Jiaie comini anamo bu jacaiñenia, jiaime anamo budi naimie anamo oreñena. Nana comini jiaie cominina jaciruiñenana jitaidicai.

Rafue 4.

Jiaie comemo maijillena jaca budi cominina ebe isoi fecañena. Iena caidica.

Rafue 5.

Cominina isi cacaitañena. Duere sefuiñellena, cominina janafefitañena.

Rafue 6.

Naga gobierno railla: -Nana cai eniruemo itinodi cominidimaci. Ie jira daje isoi nagamiiaina canoiticai -railla.

Rafue 7.

Nana comini gobierno lloga uai anamo daje isoi itimaci. Nana cominimo gobierno lloga uai daje isoi duide. Bie rafuedo jaiñedimiemona jaca buna duere sefuiñena.

Rafue 8.

Gobierno lloga uaido jaiñedimiemona bu duere sefuia, naiena raise siadollena, juez dine naimie jaillana buna rairuiñena.

Rafue 9.

Illaicominidi jamai ebena buna gaitañena. Calabozomo, cárcelmo jamai ebena buna uiñega. Ie nairai motomona budi jamai ebena dotañega.

Rafue 10.

Bumo llogidua rafue ia, naie rafue duiñena juez dine naimiena uille, naie rafue raise siadollena. Bainino iene finoñena.

Rafue 11.

1. Bumo llogidua rafue ia, naie rafuena nia siadoñenia, naimiena nia duere finoñena. Juez dine naie rafuena bainino siadoñena. Naimie dibeimo itinona naimiena riidollena rairuiñena.
2. Navui ie finoca nia rairuiñega rafue facaina birui naimiena duere finoñena. Rairuica rafue bu finoia, ie finoca facaise duere sefuillacino baifemo naimie duere sefuiñena.

Rafue 12.

Nagamie jofomo uri illa. Ie illa comini diga icirafuena finoñena. Bu naimiena uri itatañenia, naimie jitaia, ie uri itatañedimiena naimie llogidoia, iena illaicomini rairuiñena. Bu naimie jeare ñaia, naimie jitaia, naimie jeare ñaitimiena naimie llogidoia, iena illaicomini rairuiñena.

Rafue 13.

1. Ie nairaimo nine bu macariacania, illaicomini naimiena rairuiñena. Ie nairaimo nine ie jofo illana bu jitaia, illaicomini naimiena rairuiñena.
2. Jiaie nairaimo bu macariacania, illaicomini naimiena rairuiñena. Abido ie nairaimo naimie biacania, illaicomini naimiena rairuiñena. Illaicomini naimiena caidiñena.

Rafue 14.

1. Duere sefuillamona jiaie nairaimo nainomo duere sefuiñellena bu jaiacania, illaicomini naimiena rairuiñena.
2. Maraiñedicino finoñenia, naimie jaillana illaicominidi rairuiñena.

Rafue 15.

1. Naga gobierno railla: -Nana cai eniruemo itinodi cai comini. Cai nairaimo duudimaci -railla.
2. Gobierno ie cominina oni dotañena, jiaie gobierno naimacina feiñoiacaiñenia. Cai nairaimo duiñedio -illaicomini buna iese lloñena. Jiaie nairai imiena bu jaiacania, illaicomini iena rairuiñena.

Rafue 16.

1. Ie aina illena, nie eimie riñona oiacania, iena buna rairuiñena. Nie isoide riñona ollena buna rairuiñena. Ie ini illena, nie riño eiñaiño iimana oiacania, iena buna rairuiñena. Nie isoide iimana ollena buna rairuiñena. Ua mei, uruiaina iaimaiai comuitajana buna rairuiñena.
2. Aina ollena, inina ollena, conimana jitaillanona iite.
3. Naga iima ie ai diga ia, naga riño ie ini diga ia, ie nairai judaisiñeite, iadedi naga iima ie aiñede riño diga icabia, ie nairaidi judairite. Naimaci comini uri illena, naimaci nairaiai judaisiñellena, naga gobierno ie cominina canua.

Rafue 17.

1. Eniruena bu namataacania, jofona bu namataacania, rana bu namataacania, illaicomini naimiena rairuiñena. Naga come iena namataacania, jiaie comini diga iena namataacania, illaicomini naimiena rairuiñena.
2. Bumona ie eniruena, bumona ie jofona, bumona ie rana jamai ebena bairoñena.

Rafue 18.

Bue isoide ramo ie comecina facaia, buna naimiena rairuiñena. Jusiñamuina bu sedaacania, buna naimiena rairuiñena. Nie isoidimiena bu sedaacania, buna naimiena rairuiñena. Jiaie raiuedo bu jaiacania, buna naimie rairuiñena. Jiaie cominimo naimie iinuacino lluana buna rairuiñena. Ie joiomo iena lloia, jino iena lloia, naimiena buna rairuiñena.

Rafue 19.

Nie isoide ramo ie comeci facaia, naimiena buna rairuiñena. Naimie comeci facajacino muidona, naimie duere sefuiñena. Jiaie nairaimona bue isoide comecina facajacinona naimie feiñoiacania, jiaie nairaimo bue isoide comeci facajacinona naimie oretaiacania, iena illaicomini rairuiñena.

Rafue 20.

1. Jamai nie isoide rafue finollena comini ofitaia, naimacina buna rairuiñena. Nie isoide rafuemo bu duicania, iena buna rairuiñena.
2. Nie isoide rafuemo bu duiacaiñenia. Iemo naimie duiñena buna rairuiñena.

Rafue 21.

1. Naimie jitaia, danomo ofillano, nagamie ie illaicomini nie isoi ie nairai sedajacinodi siadoga. Naimie atona siadoiacaiñenia, naimie facaina jiaimiedi iena siadolle. Ie illaicominir rafuena bu siadoiacania, naimiena buna rairuiñena.
2. Illaicominina bu jaiacania, iena buna rairuiñena.
3. Comini jitailla diese illaicominidi nana cominina sedaja. Dajerie illaicominina jaillena, comini dinena naimacina fetua. Nana comini uainino naimacina fetua. Naie illaicomini meidollirui jiai lloga.

Rafue 22.

Seguro social railla rafuemo nana comini jainaiaina. Naie rafuemona ie gobierno ucube illa diese nagamie feiñua. Naimie buena jitai raillano, naimie comena jira, naimie uri illena, iese nagamie feiñua.

Rafue 23.

1. Nie isoide rana bu maijiacania, naimiena buna rairuiñena. Mare ra illanomo naimie maijia.
2. Maijille jaca illena, gobierno canua.
3. Jiaimie iemaijiamona ibana feiñoia, naimie isoi bu maijiia, ie maijiamona ibana raise feiñua.
4. Naimie comena jira, ie comini buena jitai raillano, ibana naimie raise feiñua. Raise feiñoñenia, gobierno naimiena canua.

Rafue 24.

Maijia fuilla mei, bu jafuier oiacania, naimiena buna rairuiñena: Cominina are maijitañena, iadedi naimci maijiacana dinori maijia. Fiesta raillaruimo naimaci maijitañena, iadedi nairui facaina ibaca.

Rafue 25.

1. Ie comini buena jitai raillano, ie maijimona nagamie ibana feiñua. Ie comini raise guillena, iniroi illena, jofo raise illena, remedio ollena, ie diese ibana feiñua. Bu maijinia, bu duia, bu feciñona ia, bu uaicimana jaia, ie ucube bumo iñenia, gobierno naimiena canua.
2. Riño jocua facaise gobierno naiñaiñona canua. Gobierno naga uriaina daje isoi canua. Moorede uruena canua. Naiso moto oga urue daje isoi canua.

Rafue 26.

1. Nana uruiat escuelamo jaillana buna rairuiñena. Nano jailla años facaina ibatañena. Escuelamo nana uruiatjailla. Primaria fuillanona jinie escuelamo bu jaiacania, iena illaicomini t rairuiñena. Rabena uiñotino diese nainomo feiñoga.
2. Escuelamo naga rafuena raise finuana profesor llofuega. Naga urue comena jira, iese llofuega.
3. Nana conina nabairillana llofuega.

Rafue 27.

1. Nie isoide rafue ie nairai finoia, nagamie nainomo jaillana illaicomini rairuiñena. Naie rafue ite ie comeci jaisillena jira, iena rairuiñena.
2. Nie isoide rana bu cueia, naiemona dama naimie ibana feiñuana buna rairuiñena.

Rafue 28.

Bie rabemo cuega rafue suillena buna rairuiñena. Nana comini bie isoide suille rafue illanomo jainaiaina.

Rafue 29.

1. Dani coniniri ie illanomo nagamie dajena maijia, nagamie comena jira.
2. Ie gobierno lloga uai diese nagamie ie jitaillacinona finua. Jiaie cominino ie comecina facajano iena finua. Nana comini uri illana iena finua.
3. Uri illena Naciones Unidas lloga uaina buna jeare uacaiñena.

Rafue 30.

Bie rafuedo jaiacadinona buna rairuiñena. Bie rafue uiñuamona, bie rabemo lloga rafuena buna jamaiñena.